ආගම යන්න නිර්වචනය කිරීම තරමක් අපහසුය. මෙම වචනය පොදුවේ සිංහලයේදී යෙදෙන්නේ කිසියම් ශාස්තෘවරයකුගේ ධර්ම මාර්ගයක්, උපදෙස් ක්‍රමයක්, ප්‍රතිපත්ති මාර්ගයක් හා එය වටා බැඳුණු වත් පිළවෙත් සියල්ල ද හඳුන්වාදීම සඳහා ය. එහෙත් ඉන්දියාව ශ්‍රී ලංකාව යන රටවල කිසියම් ශාස්තෘවරයකුගේ උපදෙස් ක්‍රමයක් ප්‍රතිපත්ති මාර්ගයක් හඳුන්වා දීම සඳහා ‘ධර්ම’ යන වචනයද යොදන අවස්ථා ඇත. හින්දු ධර්මය, ජෛන ධර්මය ආදී වශයෙන් ධර්ම ශබ්දය සංස්කෘත හා හින්දි යන භාෂා දෙකෙහිම ව්‍යාවහාර වේ.